No photo available

32 views - 2 months ago

Tiwason mga proyektong nasugdan: Red Durano

TIWASON ni kanhi Congressman Ramon “Red” Durano VI ang daghan nga mga proyekto sa Cebu 5th District nga iya nang nasugdan sa higayon nga siya makabalik sa Kongreso karong July 1, 2022.

Nagkanayon si Durano nga iya usab nga palapdan ang mga waterworks system sa tanang lungsod sa Cebu 5th District nga naglangkob sa Liloan, Compostela, Carmen, Catmon, Sogod, Borbon, Tudela, Poro, San Francisco ug Pilar.

Kini tungod kay ang tubig usa ka katungod sa katawhan.

Sa Danao City diin ang iyang amahan nga si Ramon “Nito” Durano III mao ang mayor, nagpabiling barato ang tubig nga tag P5 ang matag cubic meter sa premirong 10 cubic meters.

Ang napulog-usa ngadto sa 20 cubic meters, tag P7 na ang presyo. Sa laing bahin, gisuportahan karon ni Red Durano ang lakang sa Senado nga himoong “hybrid” ang election ug papason na ang karaang digital election nga maoy nakabiktima niya niadtong 2019 election.

Sa hybrid system, mano-mano ang inihapay sa balota sa barangay precincts ug digital na ang election results gikan sa municipal o city board of canvassers, provincial board of canvassers ug sa National Board of Canvassers.

Sa maong sistema, puwedeng balikon ug tan-aw ang resulta sa barangay precincts sa higayon nga dunay reklamo. Si Red Durano napiling congressman sa lima ka termino.

Sa unang termino, iyang gipulihan si Congressman Joseph Ace Durano kinsa nahimong Department of Tourism (DOT) secretary panahon ni kanhi President Gloria Macapagal Arroyo.

Ang mga Durano maoy giisip nga Niño Bonito sa Danao City ug sa ikalimang distrito sa Sugbo tungod sa kadaghan sa mga tawo nga ilang natabangan. ELIAS O. BAQUERO