No photo available

12 views - 2 months ago

CARBON VENDORS COOP NAGPAABOT SA FREEZER VAN

GIHULAT karon sa Cebu Market Vendors Cooperative (CEMVEDCO) nga ihatag na sa Department of Agriculture (DA) 7 ang gisaad nga freezer van sa ilang mga baligya nga karne sa Carbon Market ug ubang lugar.

Sa pakighinabi sa DYRC radio ug Cebu Business Week, niingon si CEMVEDCO Chairman Erwin Goc-ong nga ilang paaboton ang gisaad ni DA 7 Director Salvador Diputado aron dili na sila maguol nga may karne nga madaot ilabi na kon dugay mahalin o madugay ang delivery.

Nagkanayon si Goc-ong nga dakog ikatabang kanila ang freezer van ilabi na gikan sa pag-ihaw sa baboy, kanding ug manok, idiritsog butang ang karne ug sigurong dili madaot.

Gidugang ni Goc-ong nga nalipay ang mga opisyales ug meyembro sa CEMVEDCO sa saad sa DA nga freezer van nunot sa programa niini nga “mass food production” aron mahangwat sa kalisod tungod sa pandemya sa Covid.

Sa linaing interview, niingon si Diputado nga iyang susihon kon andam na ba ang mga dokumento sa donasyon sa freezer van gikan sa DA ngadto sa CEMVEDCO.

Nagkanayon si Diputado nga samtang dunay freezer van distribution sa mando ni Agriculture Secretary William Dar aron mosaka ang supply sa pagkaon, dunay evaluation aron sutaon kon angayan bang hatagan ang usa ka kooperatiba.

Sa una pa lang, nagtuo si Diputado nga angayang makaangkon sa freezer van ang CEMVEDCO tungod kay ang maong kooperatiba gilangkoban sa mga vendors sa Carbon Market nga nagbaligyag karne, utanon ug prutas. ELIAS O. BAQUERO