No photo available

36 views - 2 weeks ago

Screening sa moabot sa pantalan gipahunong

GIPAHUNONG na sa kagamhanan sa Siyudad sa Sugbo ang screening procedure alang sa tanang moabot nga pasahero sa pantalan nga ang Cebu City maoy destinasyon.

Si Mary Knoll Lague, ang public relations officer sa Cebu Port Authority (CPA) nipahibalo nga tungod niini, gipahunong na usab sa CPA ang shuttle service alang sa mga pasaherong moabot sa pier kay dili naman obligadong mo sakay ang mga pasaherong moabot sa pantalan.

Ang maong shuttle service maoy mohatod sa mga pasahero gikan sa ilang gisakyang barko paingon sa port staging area sa luyong bahin sa kanhi Malacañang sa Sugbo sukad pa sa imaging tuig. Ang paghunong gihimo niadtong Pebrero 11, 2021.

Kini magpasabot nga mahimo nang modiritso ang mga pasahero sa barko ngadto sa ilang adtoang lugar sa Dakbayan sa Sugbo.

Tungod niini, daghang mga taga Cebu City nga nibiyahe sa ubang probinsiya ug niuli dinhi ang nagpasalamat ni Cebu City Mayor Edgardo Labella sa maong desisyon.

Matud nila, ang daang pamaagi nga gimando sa grupo ni Cebu City Councilor Joel Garganera usa ka dakong hasol nga giantos sa katawhan sukad pa sa miaging tuig.

Ang paglibkas sa screening procedure gituohan sa katawhan nga usa ka dalan padung sa new normal. BEBIE HIÑOLA BAQUERO