KUNG DILI MAGAMIT NI PAM ANG RDC

SA reporter pa ko sa radyo ug pamantalaan, dako kaayo na nga balita namo kung kinsa ang itudlo sa Malacan̈an nga chair ug co-chair sa Central Visayas Regional Development Council.

Sa nominasyon pa lang, amo na atangan kung kinsa ang mga opisyal nga hinganlan nga kasagaran mga gobernador ug mga mayor sa dagkong dakbayan sa rehiyon.

Kana tungod sa kalapad sa gahom aron makaduso sa dagkong proyekto alang sa dakbayan, lalawigan ug sa rehiyon.

Dili ikalimod nga wala pay igong katakus si Cebu Gov. Pam Baricuatro sa pwesto isip RDC chair. Gani dayag man nga sagad sa iyang mga desisyon sa Kapitolyo nag-agad man kang Provincial administrator Ace Durano. Ambot kung matakin pa ni Pam si Ace sa RDC.

Higayon kini ni Pam nga iyang maduso ang dagkong proyekto nga kinahanglan mapondohan sa nasudnong pangagamhanan sa natad sa ekonomiya, sosyal ug inprastraktura ingon man sa development administration.

Apan sayang ang maong gahom kung dili niya magamit sa mosunod duha ka tuig ug tunga.

Salamat nalang nga giparesan si Pam sa magpapatigayon nga si Melanie Ng isip co-chair gikan sa pribadong sector kinsa lapad na sab og kasinatian sa pamatigayon ug pag-abag sa lokal nga pangagamhanan.