YANONG KASAULOGAN SA PASKO

TUNGOD kay bag-o pang nakabangon ang Sugbo gikan sa linog ug bagyo, dalaygon ang hukom sa Kapitolyo ug City Hall nga likayan ang bongga ug gastoso nga kasaulogan sa Pasko niining tuiga.

Tukma ang hukom nila ni Gov. Pam Baricuatro ug Mayor Nestor Archival tungod kay daghan pa gihapon ang nag-antos tungod niadtong mga katalagman.

Ug kay Pasko na man, natural lamang nga ang mga kawani sa mga buhatang pribado ug publiko angay nga hatagan sa naandang 13th month pay kay gilatid kini sa balaod.

Ang mga local government units ug mga kompaniya angay nga mohatag niini ngadto sa mga kawani sa sayong panahon. Dili kini angay langay langayon.

Ug kay wala may bongga nga Christmas party karong tuiga, ang budget niini mas maayo nga gamiton aron ipalit og mga gasa (dili cash) alang sa tanang kawani.

Labaw sa tanan, ang pag-atiman sa katawhan maoy labing mahinungdanon, nianang paagi nga makitawhanon.