KALAPASAN SA BALAOD

SUBO palandongon nga ang gobernador karon milapas sa balaod -- o wala motahod niini -- dihang siya mimando nga adunay kausaban sa iyang buhatan sa Kapitolyo aron kini tawgon nga bag-o.

Mitagana siyag 2.6 milyones pesos alang niini, hinungdan nga ang iyang kinaham nga kontraktor, 1020 Allied Services, misugod dayon sa iyang gimbuhaton.

Ang Kapitolyo dugay nang gideklarar isip national historical landmark ug ubos sa Akta Republika 10066 ang bisan unsang kausaban o pagpaayo o pagpatahom niini kinahanglan adunay pagtugot gikan sa National Historical Commission of the Philippines (NHCP).

Apan wala kini himoa sa gobernador ug kining maong salaod misamot dihang ang Provincial Board napakyas sa iyang tahas nga mao ang check and balance.

Ang mga board members napakyas pagpangutana sa gobernador: "Hain man ang NHCP heritage permit?"

Sa ingon nga paagi, ang mga board members sama da nga mitampo o miabag sa kalapasan sa balaod bahin sa heritage.

Ang Kapitolyo dili kay physical building lamang -- kini diwa o kalag nga nagsimbolo sa atong pagka Sugboanon ug ang salaod nga gihimo sa gobernador ug mga board members maoy pruyba sa ilang pagpabaya ug pagdagmal sa atong adunahang kasaysayan.