PAMOLITIKA TALIWALA SA KATALAGMAN

SA nangaging katuigan makadungog lang kita nga adunay pamolitika human sa katalagman kung adunay pagpihig ug pinalabi sa pagtunol og hinabang sa katawhan.

Sagad kini mahitabo diha sa mga barangay panahon sa pagpanglista sa angay hatagan sa hinabang.

Apan ang maong pamolitika mas nikuyanap na hinoon pag-ayo human sa sunod-sunod nga dagkung katalagman nga niigo sa Pilipinas ilabi na sa Sugbo kay mismo ang nga dagkong politiko mao na gayud ang aktor.

Imbis ang pagpalihok sa resources o kapanguhaan sa gobyerno alang sa dinaliang panginahanglan sa yanong katawhan nga biktima sa katalagman, mas gihatagan pa hinoon sa mga opisyal og dakong panahon ang pagbinasolay ug pagtubag-tubag diha sa social media.

Ang reklamo sa mga tawo sa kalangan sa hinabang nakasugnod sab sa kayo nga makapainit sa mga supporters ug sa mga politiko mismo.

Gani aduna pay uban nga mobugal-bugal sa mga politiko ug mosaway sa gipanghatag nga relief goods ug sakyan sab dayon sa kaatbang nga politiko.

Kung magpatigbabaw ang garbo sa mga naglingkod karon nga mga opisyal ug walay pagtambayayong sa dili alyado sa politika, ambot kanus-a pa kaha maayo ug mapabarug pagbalik ang mga nahugno ug nangagusbat nga mga inprastraktura.

Samot na kung ang nagdala sa timon walay igong kabangkaagan ug walay klarong plano alang sa rehabilitasyon.